ارباب عشق

زبانحال حضرت رباب (س)

.

مرحوم انور اردبیلی

.

باغلیوبلار سو یولون آغلاما بیچاره على

ایلمه سینمی انگشتویله یاره على

.

.

ایستینون حدّت و تأثیری سارالدوب یوزووی

طاقتون یوخ گوزون آچماقه یوروبسان اوزووی

دانشا بلموسن اما بلورم من سوزووى

چاره لی دردوه چاره ایلیه بلمور آنون

سن ئولورسن سوسوزوندان نیه بس ئولمور آنون

.

.

باغبان گورسه عطشدن گلنون رنگی سولور

گلدن آرتوق اوزی افسرده لنوب رنگی سولور

سو و یرر ریشه سینه آفتی تئز زایل اولور

سن ربابون گلی سن حیف اولا سو یوخدی علی

اورگیمده عطشوندن عطشیم چوخدی على

.

.

طایر نیمه نفس تک آچوسان شهپریوی

ووروسان قنداقوا هی بالاجا اللریوی

الى قویندا نجه قویدی فلک مادریوی

اورک آئینه سینه دودۀ آهیم یاخورام

وای منیم بختیمه سن جان ویروسن من باخورام

.

.

کاشکی قاره بولوطلار بو چوله سایه سالا

گیزلنه گون بولوط آلتندا حرارت آزالا

گلشن آل عبا سولمیا ایمنده قالا

هر نفسده جگرون آرتمیا سوز عطشی

قورتارا شاید آنیلا بالانون کشمکشی

.

.

نقدر خیمه لری گزدی خانم عمّه لرون

بیر ایچیم اولمادی سو آخمیا تا اشک ترون

نفسون تنگه دوشوب دمبدم آرتور خطرون

نه روا گل کیمی لبلر سوسوزوندان یانسون

سو یولی باغلیانون چاره یولی باغلانسون

.

.

باخدوقیجا یوزووه سینمی من داغلامشام

آغلادوقجا سنه لایلای دیمیشم آغلامشام

گاه آچوب اللروی گاهی اوغول باغلامشام

رمزیله دردوی اظهار ایلدون مادرووه

سینمون قانینى یاخدون بالاجا اللرووه

.

.

باجیلارون سوسوز آهو کیمی یاندوقجا ملور

الده سو جامی یوزه اشکینی حسرتله الور

سنی گهواره ده هر قز که گورور رحمی گلور

ایله فکر ایلیوسن ایستییَنون یوخدی على

یوخلامورسان ولی لایلای دییَنون یوخدی على

.

.

سن اسیر عطش اولدون من اسیر مجنون

چرپنورسان قفس غمده یوخون یوخدی سنون

آچ گوزون گور نقدر واردی بشیک ترپدنون

دیده تر قزلار اوزون باشوون اوسته اوتوروب

گوز بولاقنده سوسوزلار سنیچون سو گتوروب

.

.

قورخورام دست حوادث سنی بیر حاله سالا

عمروون غنچه سی هیچ آچمیا سربسته قالا

روزگارون روشی عزّتیمی الدن آلا

سن سونن شمع اولاسان عالم هجرانه اوغول

من اولام دهریده پرسوخته پروانه اوغول

.

.

آند اولا اوج جلالتده سنان شهپریمه

آند اولا دیدۀ تردن آخان اشک تریمه

آند اولا اشکیله آلوده قرا معجریمه

آند اولا نازلو رقیه باجوون خوش سوزینه

یانارام آتش هجریمله مصیبت کوزونه

.

.

یاخمارام زلف پریشانمه عمرومده حنا

چخادوب تازه لباسی گییرم کهنه قبا

گون قباقنده اوتورّام ایدرم آه و نوا

زندگی عشقینی باشیمدن ئولونجه آتارام

بالاسی اوخلانان آهو کیمی پوزقون یاتارام

.

.

سو گورن وقته سو تک گوزلریمون اشکی آخار

عوض سرمه دوتار گوزلریمی گرد و غبار

او قدر نالیه گلّم خانم عمون دارخار

صحن محنتده خزان برگی کیمی سولام على

عالم عشق و محبتده فنا اولام على

نظرات شما عزیزان: